വെമ്പായം: വെമ്പായത്ത് കെഎസ്ആർടിസി ബസ് നിയന്ത്രണം വിട്ട് ബേക്കറിയിലേക്ക് ഇടിച്ചു കയറി വൻ അപകടം. അപകടത്തിൽ ഒരാൾ സംഭവസ്ഥലത്ത് വച്ച് തന്നെ മരിച്ചു. നിയന്ത്രണം വിട്ട കെഎസ്ആർടിസി ബസ് കൊപ്പത്ത് അന്താരാഷ്ട്ര നീന്തൽ കുളത്തിന് സമീപമുള്ള ബേക്കറിയിലേക്ക് ഇടിച്ചുകയറുകയായിരുന്നു. ബേക്കറിക്ക് മുന്നിൽ ഉണ്ടായിരുന്ന രണ്ട് ബൈക്ക് യാത്രികർ അതിനടിയിൽപ്പെടുകയും ചെയ്തു.അതിൽ ഒരാളാണ് മരണപ്പെട്ടത്.കൊഞ്ചിറ ശ്രീനികേതനിൽ ജയചന്ദ്രൻ ( 57 ) ആണ് മരിച്ചത്.നിരവധി പേർക്ക് പരിക്കേറ്റു. നാട്ടുകാരും വെഞ്ഞാറമൂട് പോലീസും ചേർന്ന് പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചു

    പാലക്കാട്: പാലക്കാട് റോഡിലെ കുഴയിൽ വീഴാതെയിരിക്കാൻ ബൈക്ക് വെട്ടിച്ചതിന് പിന്നാലെ എതിരെ വന്ന ലോറിയിടിച്ച് യുവാവിന് ദാരുണാന്ത്യം. ബൈക്ക് യാത്രികനായ കൊടുമ്പ് സ്വദേശി ശങ്കർ ആണ് മരിച്ചത്.പാലക്കാട് പൊള്ളാച്ചി അന്തർ സംസ്ഥാന പാതയിലാണ് അപകടം നടന്നത്. ഈ പാതയിൽ നിരവധിയിടങ്ങളിൽ കുഴികളുണ്ട്. ഇതിൽ ഒരു കുഴിയിൽ വീഴാതെയിരിക്കാൻ ശങ്കർ ബൈക്ക് വെട്ടിച്ചതും എതിരെ വന്ന ലോറിയിൽ ഇടിക്കുകയായിരുന്നു. ശങ്കറിന്റെ മൃതദേഹം പാലക്കാട് ജില്ലാ ആശുപത്രിയിലേക്ക് മാറ്റി.