വിദേശത്ത് ജോലി വാഗ്ദാനം ചെയ്ത് ഉദ്യോഗാർത്ഥികളിൽ നിന്ന് ലക്ഷക്കണക്കിന് രൂപ തട്ടിയെടുത്ത കേസിൽ സ്ഥാപനത്തിന്റെ സിഇഒയും എംഡിയുമായ യുവതി അറസ്റ്റിൽ. ഇടപ്പള്ളിയിലും പാലാരിവട്ടത്തുമായി പ്രവർത്തിക്കുന്ന ആംസ്റ്റർ ഓവർസീസ് പ്രൈവറ്റ് ലിമിറ്റഡ്, ആംസ്റ്റർ ഇമിഗ്രേഷൻ ഓവർസീസ് എന്നീ സ്ഥാപനങ്ങളുടെ മേധാവിയായ പാർവതി മായ ഷാജിയാണ് തിരുവനന്തപുരം വിമാനത്താവളത്തിൽ പിടിയിലായത്. വിദേശത്തുനിന്നെത്തിയ ഇവരെ പോലീസ് കസ്റ്റഡിയിലെടുക്കുകയായിരുന്നു. പാലാരിവട്ടം പോലീസ് സ്റ്റേഷനിൽ രജിസ്റ്റർ ചെയ്ത രണ്ട് കേസുകളിലാണ് ഇപ്പോൾ നടപടി ഉണ്ടായിരിക്കുന്നത്.
*തട്ടിപ്പിന്റെ രീതി* : അർമേനിയ, പോളണ്ട് തുടങ്ങിയ രാജ്യങ്ങളിൽ ആകർഷകമായ ശമ്പളത്തോടെ ജോലി വാഗ്ദാനം ചെയ്താണ് പ്രതികൾ ഉദ്യോഗാർത്ഥികളെ കബളിപ്പിച്ചത്. തൃശൂർ സ്വദേശിയായ യുവാവിന് അർമേനിയയിൽ ഒന്നര ലക്ഷം രൂപ ശമ്പളം വാഗ്ദാനം ചെയ്ത് 4 ലക്ഷം രൂപയും, തിരുവാണിയൂർ സ്വദേശിയായ യുവാവിൽ നിന്ന് പോളണ്ടിൽ വെയർഹൗസ് ജോലി വാഗ്ദാനം ചെയ്ത് 6.06 ലക്ഷം രൂപയും ഇവർ തട്ടിയെടുക്കുകയായിരുന്നു.
*ഭീഷണിയും വഞ്ചനയും* : പണം നൽകിയിട്ടും ജോലിയോ വിസയോ നൽകാതിരുന്നപ്പോൾ പണം തിരികെ ചോദിച്ച പരാതിക്കാരിയെ പ്രതികൾ സമൂഹമാധ്യമങ്ങളിലൂടെ അപമാനിക്കാൻ ശ്രമിക്കുകയും ഭീഷണിപ്പെടുത്തുകയും ചെയ്തു. പോളണ്ടിൽ ജോലി വാഗ്ദാനം ചെയ്ത് പണം വാങ്ങിയ ശേഷം പകരം സെർബിയയിലേക്ക് അയച്ച് വഞ്ചിച്ചതായും എഫ്ഐആറിൽ വ്യക്തമാക്കുന്നുണ്ട്.
*നിയമവിരുദ്ധ പ്രവർത്തനം* : യാതൊരുവിധ ലൈസൻസുമില്ലാതെയാണ് പ്രൊട്ടക്ടർ ഓഫ് എമിഗ്രന്റ്സ് നിയമങ്ങൾ ലംഘിച്ച് ഈ സ്ഥാപനങ്ങൾ പ്രവർത്തിച്ചിരുന്നത്. കോടതി നിർദേശപ്രകാരമാണ് പോലീസ് കേസെടുത്ത് അന്വേഷണം ആരംഭിച്ചത്. പാർവതി മായ ഷാജിക്ക് പുറമെ ഭർത്താവ് അനീഷ് മേനോൻ, മാനേജർമാരായ അഭിജിത്ത്, അജു കെ മാത്യു, വിഷ്ണു വിജയൻ എന്നിവർക്കെതിരെയും ബിഎൻഎസ് വകുപ്പുകളും എമിഗ്രേഷൻ ആക്ടും പ്രകാരമാണ് കേസെടുത്തിരിക്കുന്നത്.
